Saturday, April 07, 2012

postheadericon A sen chi

Ka tunhma nun ah chuan piantharna chang tawh in rawngbawlna lam ah te pawh ka lo inhmang ve viau tawh thin a. Nimahsela, setana thlemna do zawh loh avangin khawvel lama kir leh chak na in nasa takin thlemin ka awm a, a rawng ka bawl sak Lalpa chu sawi rual loh khawp in ka lo bo san leh ta a. Rinawmloh na te, bumna te, lerh na te zu hmun sa hmun ngainatna te in ka nun chu ka hmang chho leh ta a. 

Ka nun ka bih let chang hian Pathian rawng ka theih ang tawk a kalo bawl ve thin lai te kha ka ngai em em thin a, nimahsela, thian te nen han inhmuhkhawm let let a zu han in a han ruih te ka la thlahlel em em a, ka thil chin tha lo te chu bansan a sim ka duhtak zet thin. Tawngtaia ngaihdam dil pawh ka ngah. Amaherawhchu, keima chak na ringawt chuan (Pathian tanpuina chudil ve bawk thin mah ila) rei ka daih thei hauh lo va.

Vawikhat chu ka nun tuihal zia ka inhriat chian em em avang leh heti mai chuan ka boral mai dawn a ni tih ka inhriat chian em avangin rawngbawltu - Pastor, missionary,adt. te kawmin ka chhuak thin ta a. An life experience te leh Pathian thu te nen min kawm thin a, min tawngtai sak fo reng bawk a.

Tichuan, 5th April, 2012, Maundy Thursady khan nilengin rawngbawltu pakhat nen kan inkawm ta a. Ka lu ah hriak te thih in min tawngtaisak a, keipawh min tawngtai tir a, HNEHNA pawh min puantir nghe nghe a. Kaninkawm zo a, keimahah danglamna hranpa em em lang chhuak a awm lem lo. Mahse, khawvel lama kir leh ka tum tawh lohna rilru chu ka sawhnghet sauh sauh zela. He zan hian Biak In ah inkhawm turin ka pen chhuak ta nghe nghe a. Sacrament zan a lo ni bawk a, Sacrament kan chan dawn lai vel leh kan chan zawh hnu ah ka pianhnu lama ngaihtuah pawh ka la ngaihtuah chhin ngai reng reng loh chuan ka rilru a rawn luah khat ta a, chu chu hei hi a ni....

Hmanah (khawvela ka tlan lai) chuan hlimna, nawmsakna, hahdamna leh rual pawlna anih ringin thlahdah takin ka nun ka lo hmang thin a, "a sen chi" (zu) nasa takin ka in thin. Mahse, ruih chhung reilote bak chu sum leh pai indaih loh na te, chhungkua hlimloh na te, inhauh buai fo na te, pawlawh na te, lungngaih na te, manganna te leh nun beidawn rum2 ah min hruai lut tu mai alo ni. Mahse, hemi zan a Pathian Biak In thianghlimah "a sen chi" (sacrament) ka chan ve thung chuan "A vuakna vual te avangin min ti dam ta a, a thisen hlutak luang chuan ka sual zawng zawngte a tlengfai a, ka khawlohna te min thaibo sak ta a ni!" A va han ropui tehlul em! Lalpa chu fakin awm mawlh rawh se!

Tun a chinah chuan Lalpa, ka theih na zawng zawng nen I rawng chauh bawl tawh turin ka nung tawh ang. I rawngbawltu, I mi hmantlak ni turin ka rawn inhlan thar leh a, chutiang ang tak tur chuan I tan chauh ka nun ka vawng uluk tawh ang. Lalpa, ka lawm e!

Amen!

Print this post Share

13 comments:

Jinx said...

A va han ropui em!! Pathian 'duh' tih mai hi a tawk lova, mahni ngei a pen a pen chhuah hi min phut si a, a har thin khawp mai. Mahse Pathianah tihtheihloh a awmlo tih kha hrereng thin ila.

'Amah chu ring la, aman a ti vek ang' tih ang khan, i nun kaihruai zel turin tawngtainaah kalo hre thin dawn che nia. A ropui takzet!!! Lalpa chu fakin awm mawlh2 rawh se!!

^-||RaLtE||-^ said...

Thanks. Ni e, tawngtaipui ka ngai tak zet zet.

Maisek said...

Lalpan a hmangaih che a, i tlan bosan a phal lo ani tin hria la, a mi te lakah a thik thu chhiat zia hrechiangtu i ni a, hremhmun kotlanga i dak tawh kha, a zahngaihna vang liau liau in hnuh kir in i awm ani tih hria la, setana thlemna do a, hneh zel turin tan la sauh sauh la, kan tawngtaipuina che hi ti thlawn lul suh ang che. Lalpa, ka lawm e....

^-||RaLtE||-^ said...

A dik khawp mai. Min tawngtaisak thin na avangin ka lawm e.

Anonymous said...

A ropui hle mai. He i thuziak ngei hi nangmah fuihtu leh tichaktu lo ni zel teh se.

^-||RaLtE||-^ said...

Ts, ka lawm lutuk e.

H.Vangchhia said...

Tha lutuk tha lutuk. Zu kanin anih pawhin kan tih tur leh mawhphurhna hlen loh phah nan emaw, rui (a bual) lo tala inthiam hi alo pawimawh khawp mai.

Chhungkaw budget leh engkim mai buai khawp a zu duh ngat tawh chinah phei hi chuan, inloh law law hi kan tan thiltha ber ani fo reng a ni.

Pathian lam a i kal thei chu ka lawmpui che. Keep it up. KZP

^-||RaLtE||-^ said...

Thanks HV... :-)

H.Vangchhia said...

WC :)

Anonymous said...

Chung lam hrin lo ni zel ang che!

Hlua said...

A va ropui em hei chu.

^-||RaLtE||-^ said...

Sekibuhchhuak & Hlua, thanks :)

H.Vangchhia said...

I reh lutuk

Sam 66:18

"Ka thinlunga sualna ka ngaihsak chuan Lalpan mi ngaithla lovang:."

Zawnawlna...

Page visited since May 29,2001

back to top